इस्लामावाद । पाकिस्तानको नजिकको मित्र मानिएकाे चीनले पनि अहिले आएर साथ दिनबाट पछि हटिरहेकाे छ । चीनले पाकिस्तानको आन्तरिक अवस्था बुझेकोले आर्थिक सहयाेग गर्नबाट पछि हटिरहेकाे हाे ।
पाकिस्तानमा आर्थिक संकट लागेसँगै सुरक्षाको अवस्था पनि नाजुक बन्दै गएको छ । चीनले पाकिस्तानमा बस्ने आफ्ना नागरिकहरूलाई सावधान रहन सल्लाह दिएको थियो। त्यसको केही दिनपछि चीनले पाकिस्तानस्थित आफ्नो दूतावासको कन्सुलर खण्ड अस्थायी रूपमा बन्द गरेको हाे । गत वर्षको अन्त्यदेखि पाकिस्तानका विभिन्न आतंकवादी समूहले चिनियाँ नागरिकमाथि पटक-पटक आक्रमण गरिरहेका छन् ।
पाकिस्तानको जियो न्यूजको रिपोर्टका अनुसार दूतावासले कन्सुलर खण्ड बन्द गर्नुको कारण प्राविधिक समस्या रहेको बताएको छ । तर बन्दको समय सीमाको बारेमा कुनै विशेष जानकारी नदिएकाे समाचारमा उल्लेख छ ।
“प्राविधिक कठिनाइहरूको कारण, इस्लामाबादमा चिनियाँ दूतावासको कन्सुलर खण्ड फेब्रुअरी १३, २०२३देखि अर्को सूचना नआएसम्मका लागि अस्थायी रूपमा बन्द हुनेछ,” सूचनामा भनिएको छ।
गत हप्ता, चिनियाँ सरकारले एक सूचना जारी गर्दै चिनियाँ नागरिकहरूलाई पाकिस्तानमा बिग्रिएको आन्तरिक सुरक्षाका कारण समस्यामा पर्न सक्ने भन्दै सतर्क रहन सल्लाह दिएको थियो।
वास्तवमा अफगानिस्तानमा तालिबानको सत्ता स्थापित भएपछि पाकिस्तान तालिबानसँग विचलित भएकाे छ। गत वर्षको अन्त्यतिर पाकिस्तानी तालिबान समूहले सरकारसँगको सम्झौता अन्त्य गरेपछि पाकिस्तानमा आतंकवादी हमलामा वृद्धि भएको हाे।
महत्वाकांक्षी चीन-पाकिस्तान आर्थिक करिडोर (सीपीईसी) मा काम गरिरहेका चिनियाँ नागरिकहरूलाई पाकिस्तानमा विभिन्न आतंकवादी समूहहरूले बारम्बार आक्रमण गरेका छन्। सीपीईसी चीनलाई अरब सागरमा जोड्ने पाकिस्तानमा सडक, रेलमार्ग, पाइपलाइन र बन्दरगाहहरूको ६५ बिलियन डलर लगानी हाे। गत अप्रिलमा कराँचीमा एक महिला आत्मघाती हमलाकारीले तीन चिनियाँ शिक्षक र उनका स्थानीय चालकको हत्या गरेकी थिइन् ।