काठमाडौं । वाणिज्य, आपूर्ति तथा उपभोक्ता संरक्षण विभागले बबरमहलमा रहेको सफ्टवेयर कम्पनी इ-ज्ञानकुन्ज एजुकेसन सिस्टम प्राइभेट लिमिटेडमा करीब १० लाख रुपैयाँ बराबरको ६३ कार्टुन पर्सनल प्रोटेक्टिभ इक्विपमेन्ट (पिपिई) सामग्री लुकाएर राखेको अवस्थामा फेला पारेकाे छ। विभागका अनुसार लुकाइएको सामान आँखु इन्टरप्राईजेज रहेको छ।

पञ्जा, चस्मालगायत लुकाएर राखिएका पिपिई सामग्रीको मूल्य ८ देखि १० लाख रुपैयाँ बराबर रहेको अनुमान गरिएको विभागको बजार अनुगमन शाखाका निर्देशक सागर मिश्रले बताए।

लुकाएर राखिएको सामान विभागले सिलबन्दी गरेपछि आखुँ इन्टरप्राइजेजको एक जना प्रतिनिधिमात्रै विभागको सम्पर्कमा आएका छन्। शिक्षासम्बन्धी सफ्टवेयर बनाउने कम्पनी इ–ज्ञानकुन्ज र आँखु इन्टरप्राइजेजको सम्बन्धबारे भने विस्तृतमा जानकारी भइनसकेको विभागले जनाएको छ।

मेडिकल सामग्रीको आपूर्तिकर्ता कम्पनी आँखु इन्टरप्राइजेजले बढी मूल्यमा सामान बिक्री वितरण गरेको भन्दै विभागमा एउटा उजुरी आएकोे थियो। उजुरी आएपछि विभागले आँखु इन्टरप्राइजेजले चीनबाट ल्याएको ती सामानको तातोपानी नाकाबाटै ट्रयाकिङ थालेको थियो।

काठमाडाैँ। चीनबाट सुरू भइ विश्वव्यापी महामारीको रुपमा फैलिएको कोरोना भाइरस (कोभिड-१९) को परीक्षण दायर बढ्दै गएको छ। स्वास्थ्य तथा जनसंख्या मन्त्रालयका अनुसार शनिबारबाट देशभरका १७ अस्पतालबाट पोलिमरेज चेन रियाक्सन (पीसीआर) विधिबाट परीक्षण सुरु भएको हो।

मन्त्रालयका प्रवक्ता डा. विकास देवकोटाका अनुसार शनिबार विराटनगरस्थित कोसी अस्पतालसँगै त्यहाँ रहेको प्रादेशिक जनस्वास्थ्य प्रयोगशालाबाट पीसीआर विधिबाट कोरोना परीक्षण सुरु भएको जानकारी दिए।

मन्त्रालयका अनुसार पीसीआर विधिबाट १३ हजार ९८ नमुना परीक्षण भएका छन् भने र्‍र्‍यापिड डायग्नोस्टिक टेस्ट (आरडीटी) विधिबाट ४८ हजार ५ सय २९ नमुना परीक्षण भएका छन्। पछिल्लो २४ घण्टामा १२ सय ५२ नमुना परीक्षण भएको छ। २४ घण्टामा परीक्षण भएका नमुनामा सबै रिपोर्ट नेगेटिभ आएको छ।

मन्त्रालयका अनुसार अहिलेसम्म ५९ जना संक्रमित छन्। जसमध्ये १६ जना निको भएर डिस्चार्ज भएका छन् भने ४३ जनाको विभिन्न अस्पतालमा उपचार भइरहेको छ। सातै प्रदेशमा गरेर २२ हजार ९ सय ७८ जना क्वारेन्टाइनमा छन्। उपत्यकामा चार र बाहिर ८५ गरेर ८९ जनाको आइसोलेसनमा उपचार भइराखेको छ।

इटहरी । सुनसरीको इटहरीमा सामुहिक बलात्कारको आरोपमा दुईजना पक्राउ परेका छन् भने आरोपित अन्य ७ जना फरार रहेका छन्।

मोरङको सुन्दरहरैंचा २ कि १७ वर्षीया किशोरीको उजुरीको आधारमा प्रहरीले २ जनालाई पक्राउ गरेको हो। अनुसन्धानमा बाधा पर्ने भन्दै प्रहरीले आरोपितका साथै अन्य घटना विवरण सार्वजनिक गरेको छैन।

ती किशोरीलाई पुर्याइदिने भन्दै इटहरी ११ सिमरबनाका त्रिलोचन चौधरी र अमित चौधरीले सिमरबना चोक पुर्‍याएका थिए। त्यहाँ दुवैजनाले अरु ७ जनालाई पनि बोलाएको पीडित युवतीको भनाइ छ। युवतीका मामाको सालो पर्ने दुवै मुख्य आरोपित पक्राउ परेका छन्।

गत वैशाख १४ गते मामाको घरमा पुजा सकेर आफ्नो घर जान भनेर हिँडेकी युवतीलाई पुर्‍याइदिने बहानामा इटहरी ११ स्थित सिमरबना चोक नजिकको बगैंचामा बलात्कार गरेका हुन्। अन्य ७ जनाको खोजी भइरहेको इलाका प्रहरी कार्यालय इटहरीले जनाएको छ।

काठमाडौं। प्रहरी प्रधान कार्यालयले ६ जिल्लामा एसपीको सरुवा गरेको छ । एसएसपीमा बढुवा भएपछि रिक्त पदमा काज सरुवा गरिएको हो ।

सुनसरीमा कमल थापा, बर्दियामा केदार रजौरे, दाङमा गणेश चन्द, नवलपरासी (पश्चिम)मा अजय केसी, बाग्लुङमा शारदा चौधरी र कैलालीमा अनुपमशमशेर जबरालाई पठाइएको प्रहरी प्रधान कार्यालय स्रोतले  जनाएको छ ।

सुनसरीका यज्ञविनोद पोखरेल, बर्दियाका राजेश बाँस्तोला, नवलपरासी(पश्चिम)का लालमणि आचार्य, दाङका जनक भट्टराई, बाग्लुङका नवराज भट्ट तथा कैलालीका सुदीप गिरी एसएसपीमा बढुवा भएपछि ती जिल्लामा एसपीको दरबन्दी रिक्त भएको थियो ।

त्यस्तै एसपीमा बढुवा भएपछि डिएसपी इन्चार्ज रहेका कार्यालयमा पनि सरुवा गर्न लागिएको छ ।

काठमाडौं। हालै विवाह गरेकी नायिका प्रियंका कार्कीले हनिमुन मनाउन नभ्याउँदै देशमा लकडाउन सुरु भयो । त्यसयता उनी घरभित्रै श्रीमानसँग दिन बिताइरहेकी छिन् । प्रियंकाले अभिनेता आयुष्मान देशराज जोशीसँग फागुन १५ गते विवाहबन्धनमा बाँधिएकी थिइन्। अहिले यो जोडी भैँसेपाटीमा रहेको नयाँ घरमा बस्दै आएको छ । अहिले उनीहरु त्यहीँ ‘लकडाउन’ मनाइरहेका छन् ।

लकडाउनले गर्दा नयाँ घरको सजावटको लागि प्रशस्तै समय पाएको प्रियंकाले बताइन् । उनले भनिन्, ‘नयाँ घरको सेटअप गर्न पाइएको थिएन । यो लकडाउनले त्यसका लागि समय दियो ।’

क्वारेन्टाइनमा बस्दा चलचित्रको स्कृप्टसमेत लेखिरहेको प्रियंका बताउँछिन्। उनी ‘जस्ट अनादर लभ स्टोरी’ को दोस्रो सिजनको लागि स्क्रिप्ट लेखिरहेकी छिन् । प्रियंका भन्छिन्, ‘धेरैले यसको दोस्रो सिरिजको अपेक्षा गर्नुभएको छ । यसलाई तयार गर्दैछु ।’

यस बाहेक प्रियंकाले विदेशी समूहसँग मिलेर गर्ने दुई वटा प्रोजेक्टको पनि स्क्रिप्ट तयार गरिरहेकी छिन् । उनले ती दुई प्रोजेक्टमा काम गर्न साइन गरिसकेको बताए पनि नाम खोल्न चाहिनन् ।

स्क्रिप्ट लेख्दा अल्छी लाग्यो भने प्रियंका सिरिजहरु हेर्ने गर्छिन् । ‘चलचित्र खासै हेर्दिनँ । सिरिजहरु हेर्दा रमाइलो लाग्छ,’ प्रियंकाले सुनाइन् ।

पुस्तकमा रुचि भए पनि पढ्न चाहिँ नभ्याएको उनले बताइन् । उनको नयाँ घरमा पुस्तक पनि छैन ।

प्रियंकालाई खानामा उत्ति सोख छैन । आयुष्मान पनि उस्तै । त्यसैले उनले खाना बनाउनमा कुनै अभ्यासहरु गरेका छैनन् ।
प्रियंका भन्छिन्, ‘हामी दिनमा एकपटक मात्र खाना खान्छौँ । अरु केही मिलाएर खाने गरेका छौँ ।’

क्वारेन्टाइनमा बस्दा प्रियंकालाई मोटाउने डर छँदैछ । ‘मलाई लाग्छ यो समय जो कोही पनि मोटाउँछ होला’, प्रियंका भन्छिन्, ‘तर, घरमा पनि हामीले विभिन्न व्यायामहरु गरिरहेका छौँ । जिम जान नपाएकोले पनि सामान्य अभ्यास गरिरहेका छौँ ।’

प्रियंका र आयुष्मानले हनिमुनको योजना बनाउन भ्याएकै थिएनन् । विदेशी प्रोजेक्ट गर्नुपर्ने भएकाले प्रियंकासँग समय थिएन । अब लकडाउन सकिएपछि मात्रै उनीहरुले हनिमुनको विषयमा सोच्नेछन् ।

काठमाडौं । नायिका सुष्मा कार्कीले दुई वर्षअघि गरेको कलाकारको आलोचनाका कारण यतिबेला विवाद खेप्नुपरेको छ । त्यो आलोचनालाई हजारौंले टिकटक बनाएर सेयर गरेका छन् । यही टिकटकका कारण अभिनेत्री सुष्मा कार्की अहिले विवादमा परेकी छन् ।

आफूलाई बदनाम गर्न र कलाकारसँग आफ्नो सम्बन्ध बिगार्न केही मानिसहरू लागिपरेका यी अभिनेत्रीले टिप्पणी गरेकी छन् ।

अभिनेत्री सुष्मा कार्कीको एउटा पुरानो अन्तर्वार्ता यतिबेला भाइरस भएको छ । सोही अन्तर्वार्ताका कारण अभिनेत्री पूजा शर्मालगायत कलाकारका अन्य समर्थकले अभिनेत्री सुष्मा कार्कीको सामाजिक सञ्जालमा टिप्पणी गरेका हुन् ।

उनले राजेश हमालको एक्टिङ नराम्रो तर फिल्म चलिरहेको छ भनेकी थिइन् । यस्तै, अभिनेत्री सुष्माले पूजा शर्मादेखि गायिका मेलिना राईसम्मलाई चिन्दिनँ भन्दै दिएको अन्तर्वार्ताले टिकटक बनाएर प्रचारमा ल्याइएको छ । यसलाई सुष्माले नियोजित भनेकी हुन् । मेलिना राई र राजेश हमालका प्रशंसकले पनि टिकटकमार्फत सुष्माको अन्तर्वार्तालाई भाइरल बनाएका छन् ।

यसै विषयमा यी अभिनेत्रीले भनेकी छन्, ‘मैले दुई वर्षअघि दिएको एउटा अन्तर्वार्तालाई अहिले टिकटक बनाएर उडाउने काम गरिएको छ । मैले नै बिर्सिसकेको यो अन्तर्वार्तालाई कसैले नियोजित रूपमा टिकटक बनाएर कलाकारसँग मेरो सम्बन्ध बिगार्न खोजेको हो ।’

अभिनेत्री पूजा शर्मासँग अहिले आफ्नो सम्बन्ध निकै राम्रो भएको सुष्माले बताएकी छन् । पूजाको प्रशंसा गर्दै उनको अभिनय राम्रो भएको पनि सुष्माले जिकिर गरेकी छन् । जब कि त्यो अन्तर्वार्तामा उनले पूजाको अभिनय कमजोर भएको भन्दै टिप्पणी गरेकी थिइन् ।

पूजासँग अहिलेको सम्बन्धबारे अभिनेत्री सुष्माले भनेकी छन्, ‘पूजाले मलाई दिदी भन्छिन् र म उसलाई बहिनी भन्छु । मिडियाहरूले उचालिदिएर हामो सम्बन्ध बिगार्ने प्रयास गरिरहेका छन् ।’

टिकटक बनाएर आफ्नो बदनाम गर्न खोजेपछि अभिनेत्री सुष्माले पनि टिकटकमार्फत नै आफूहरूको सम्बन्ध राम्रो भएको जवाफ दिएकी हुन् । लकडाउनका कारण मानिसहरू घरमा बेकामे भएको र उहिलेको कुरा खोतलेर अहिले सम्बन्ध बिगार्न खोजेको पनि यी अभिनेत्रीको टिप्पणी छ ।

त्यसो त आफूले नायिका पूजाको टिप्पणी गरेको र गायिका मेलिनालाई नचिनेको भन्ने भिडियो अन्तर्वार्ता सम्पादन गर्नसमेत यी अभिनेत्रीले अनुरोध नगरेकी हैनन् । तर, दुई वर्षअघि नै युट्युबमा राखिएको यो भिडियोलाई सम्पादन गर्नतर्फ सम्बन्धित मिडियाले वास्ता नगरेपछि त्यही प्रसंगले यतिबेला सुष्माले टिप्पणी सहनुपरेको हो । त्यो भिडियो अहिलेको नभएको फेरि पनि यी अभिनेत्रीले जिकिर गरेकी छन् । -राजधानी दैनिक

काठमाडौँ । कोरोना महामारीको अवस्थालाई मध्यनजर गर्दै कतार सरकारले जेलमा रहेका १७ जना नेपाली कैदीबन्दीलाई आममाफी दिएको छ ।

कतारका राजा अमिर मौसूफ शेख तमिम बिन हमाद अल थानीले कैदीहरुको स्वास्थ्य र मानवीय अवस्थालाई ध्यानमा राखी उनीहरुलाई आममाफी दिएको बताए।

विभिन्न कसुरमा कतारको बन्दी गृहमा रहेका १७ जना नेपाली नागरिकहरुलाई आममाफी दिइ रिहाई गर्न लागिएको दोहास्थित नेपाली राजदूतावासले जनाएको छ ।

आममाफी पाएर रिहाइ हुनेमा १३ जना लागू औषध कारोवारजन्य, २ जना चोरी, १ जना मादक पदार्थ कारोबार र अर्का १ जना ठगीको कसुरमा सजाय भुक्तान गरिरहेका नेपालीहरु रहेको दूतावासले जनाएको छ।

काठमाडौँ । कुवेतमा थप ११ जना कोरोना भाइरस (कोभिड १९) बाट संक्रमित भएका छन् । कुवेतमा संक्रमित नेपालीको संख्या ७५ पुगेको छ ।

कुवेतको स्वास्थ्य मन्त्रालयको पछिल्लो २४ घण्टाको सार्वजनिक सूचनाअनुसार थप ११ जना नेपालीसहित ३ सय ५३ जनामा कोरोनाको संक्रमण देखिएको हो । उक्त देशमा हरेक दिनजसो नेपालीको संक्रमण बढ्दै गइरहेको छ ।

हालसम्म ४ हजार ३ सय ५७ जना पुगेको छ । जसमा १६ सय २ जनालाई निको भएको छ । ३० जनाको मृत्यु भएको छ । ७० जनाको अवस्था जटिल छ ।

काठमाडौं : कोरोना भाइरस कोभिड-१९ को जोखिम हुन नदिन लकडाउन जारी रहदा नेपालमा रोकिएका विभिन्न ५४ मुलकका ३०९ विदेशी नागरिक लिई कतार एयरवेजको वाइडबडी जहाज फ्रान्सको पेरिसतर्फ उडेको छ।

त्रिभुवन अन्तर्राष्ट्रिय विमानस्थलका अनुसार नेपालस्थित फ्रान्सेली दूतावासले चार्टर गरेको सोे उडान कतारको दोहा हुँदै पेरिस पुग्नेछ। जहाजमा युरोपेली मुलुक तथा दक्षिण अफ्रिका, इजरायल, अमेरिका, क्यानाडालगायत मुलुकका नागरिक छन्।

यो उडानसहित लकडाउन अवधिमा कतार एयरवेजको ११ उडान भएको छ। कतारपछि नेपाल वायु सेवा निगम (नेपाल एयरलाइन्स) ले आठ अन्तर्राष्ट्रिय उडान गरेको छ। नेपालबाट तीन नेपालीसहित ३० वायु सेवा प्रदायक कम्पनीले उडान भर्दै आएका छन्।

सरकारले २०७६ चैत ११ देखि देशभार लकडाउन गरेको छ। पछिल्लो पटक आगामी वैशाख २५ सम्म लकडाउनलाई निरन्तरता दिने निर्णय भएको छ। यो अवधिमा गत चैत १० गतेदेखि आगामी जेठ २ गतेसम्म नेपालमा उडान भर्ने सबै अन्तर्राष्ट्रिय हवाई उडान प्रतिबन्ध गरिएको छ।रासस

काठमाडौँ – बन्दाबन्दीको एक महिना बिते पनि काठमाडौँवासीको आशाको केन्द्र राष्ट्रिय गौरवको मेलम्ची खानेपानी आयोजनाको सुरुङको अन्तिम विन्दु सुन्दरीजलमा काम जारी छ। आयोजनामा सुरुङभित्र र सुरुङबाट पानी निस्कने स्थानमा ढोका राख्ने व्यवस्था भइरहेको सुन्दरीजल साइड हेर्ने इञ्जीनियर रामजी लामिछानेले बताए। आयोजनामा २८ जना कामदारले नियमित काम गरिरहेका छन्। सुन्दरीजलमा भइरहेको कामको नियमितरूपमा अनुगमन एवं मूल्याङ्कनसमेत भइरहेको उनले बताए।

बिहीबार मेलम्ची खानेपानी आयोजनाका कार्यकारी निर्देशक तिरेशप्रसाद खत्री, निर्माण कम्पनी सिनो हाइड्रो र परामर्शदाता कम्पनी इप्तिसाका प्रतिनिधिबीच सुन्दरीजलका कामको स्थलगत अनुगमनपछि अझ गतिका साथ काम अघि बढाउने विषयमा सहमति भएको थियो। एक महीनामा सुन्दरीजलको काम सक्ने सहमति छ। सुन्दरीजलमा आठ करोड ५० लाख लिटर पानी प्रशोधन केन्द्र निर्माण भइसकेको छ। उति नै क्षमताको अर्को संरचना निर्माण अन्तिम चरणमा पुगेको छ। एक महिनामा सुन्दरीजलको प्रशोधन केन्द्रको काम पनि सक्ने गरी काम भइरहेको जनाइएको छ। असार मसान्तसम्म मेलम्ची खोलाको दैनिक १७ करोड ७० लाख लिटर पानी सुन्दरीजलमा झार्ने आयोजनाको लक्ष्य छ।

पानी झरेपछि सुन्दरीजलका दुई प्रशोधन केन्द्रमा परीक्षण गरी उपत्यकामा वितरण गरिने छ। पानी वितरणका लागि पहिलो चरणको सञ्जाल उपत्यकाभर निर्माण भइसकेको काठमाडौँ उपत्यका खानेपानी लिमिटेड आयोजना कार्यान्वयन निर्देशनालयले जनाएको छ। सञ्जाल निर्माणमा दोस्रो चरणको काम पनि भइरहेको छ। सिन्धुपाल्चोकको हेलम्बु गाउँपालिकास्थित मेलम्ची खोलाको मुहान क्षेत्रमा हेडवक्र्सको काम भइरहेको मेलम्ची खानेपानी विकास समितिका प्रवक्ता राजेन्द्र पन्तले बताए। बन्दाबन्दीमा पनि सुरक्षाका सबै विधि अपनाएर आयोजनाको काम भइरहेको छ। सुन्दरीजल र मेलम्ची दुवैतिर काम गर्ने कामदारलाई कार्यस्थलमै आवासीयरूपमा बस्ने व्यवस्था निर्माण कम्पनी सिनो हाइड्रोले गरेको छ।

मेलम्चीबाट काठमाडौँको सुन्दरीजलसम्म करिब २७ किमीको सुरुङ तयार भइसकेको छ। सुरुङभित्र फिनिसिङको काम पनि अन्तिम चरणमा पुगेको जनाइएको छ। बन्दाबन्दीले काममा केही प्रभाव परे पनि असारको आसपासमा पानी ल्याउने आयोजनाको लक्ष्य जारी छ। यसअघि विसं २०७३ देखि पटकपटक मेलम्चीको पानी राजधानीमा ल्याउने मिति सारिँदै आएको छ। रासस