एजेन्सी। भारतमा एक टेलिभिजन पत्रकारको गोली हानी हत्या गरिएको छ । उत्तर प्रदेशस्थित बलिया जिल्लाको फेफना थाना क्षेत्रमा सोमबार राति पत्रकार रतन सिंहको गोली हानी हत्या भएको हो ।

यो घटनामा तीन जनालाई गिरफ्तार गरिएको छ । कार्यालयबाट घर जाँदै गर्दा उनीमाथि आक्रमण भएको थियो ।

अरविन्द सिंह, दिनेश सिंह र सुनीलकुमार सिंहलाई गिरफ्तार गरिएको हो । प्रहरीका अनुसार पत्रकार सिंहको आफ्ना छिमेकीसंग जमीनको विषयमा विवाद चलिरहेको थियो ।

सोमबार समेत पनि दुवै पक्षबीच झगडा भएको थियो । छिमेकीले नै गोली हानी मारेको आरोप लागेको छ । पक्राउ परेका दिनेश पत्रकार रतन सिंहका टाढाका नातेदार हुन् । घटनाको छानबिन जारी रहेको प्रहरीले जनाएको छ ।

रतनको हत्यापछि बलिया श्रमजीवी पत्रकार युनियनले बिरोध जनाउँदै दोषीलाई कारवाहीको माग गरेको छ ।

काठमाडाैँ । कोरोना महामारी रोकथाम एवं नियन्त्रण शिर्षकमा प्रदेश २ सरकारले २ अर्ब १ करोड ७१ लाख भन्दा बढी रकम खर्च गरेको छ । प्रदेस सरकारले कार्यक्रम संशोधनसहित थप निकासा गरेको देखिएको छ ।

गत आर्थिक वर्ष २०७६र०७७ मा कोरोनाभाइरस रोकथाम, नियन्त्रण एवं उपचारको नाममा ५ वटा मन्त्रालयलाई १ अर्ब १७ करोड ७३ लाख ३४ हजार ७ सय ८० रुपैयाँ थप रकम निकासा र ५१ करोड ७३ लाख रुपैयाँ कार्यक्रम संशोधन गरी कुल १ अर्ब ६९ करोड ४६ लाख ३४ हजार ७ सय ८० रुपैयाँ निकास गरिएको आर्थिक मामिला तथा योजना मन्त्रालयले जनाएको छ ।

मन्त्रालयले सार्वजनिक गरेको कोरोना भाइरस रोकथाम, नियन्त्रण एवं उपचारका लागि थप बजेट निकासा र रकमान्तर विवरणमा सबै भन्दा बढी रकम सामाजिक विकास मन्त्रालयलाई रहेको छ । बजेट बाहेक थप रकम निकासा र कार्यक्रम संशोधन गरिएको हो ।
सामाजिक विकास मन्त्रालयलाई ८६ करोड ५५ लाख ८४ हजार ७ सय ८० रुपैयाँ थप निकासा र ५४ लाख कार्यक्रम संशोधन सहित ८७ करोड ९ लाख ८४ हजार ७ सय ८० रुपैयाँ निकासा गरेको हो । समाजिक मन्त्री नवल किशोर साहका कान्छो छोरा सुमित साह सुडीले कमिशन खाएर अधिकांश रकम भ्रष्टाचार गरेको अनेकौ प्रमाण र बिल समेत सार्वजनिक भैसकेको छ । समाजिक मन्त्रालयबाट बिना कमिशन कुनै पनि बजेट खर्च नहुने गरेको एक कर्मचारीले नै खोज केन्द्रलाई जानकारी दिए ।

त्यसैगरी आन्तरिक मामिला तथा कानून मन्त्रालयलाई रकमान्तर सहित ११ करोड ६६ लाख ५० हजार उद्योग, पर्यटन, वन तथा वातावरण मन्त्रालयलाई राहतका लागि ३३ करोड ७० लाख, भूमि व्यवस्था, कृषि तथा सहकारी मन्त्रालयलाई कृषि ऋण ब्याजमा राहतका लागि ३६ करोड र भौतिक पुर्वाधार विकास मन्त्रालयलाई कोरोना शिर्षकमा खानेपानी सरसफाई डिभिजन कार्यालयलाई २५ लाखका दरले १ करोड रुपैयाँ थप बजेट निकासा गरिएको छ ।

यी बाहेक मुख्यमन्त्रीको नेतृत्वमा रहेको कोभिड–१९ व्यवस्थापन कोषमा संचालक समितिलाई २५ करोड रुपैयाँ निकासा गरिएको छ । त्यसबाट गंगूली क्वारेन्टाईन व्यवस्थापनका लागि ५० लाख, गजेन्द्रनारायण सिंह अस्पताल राजविराजलाई औषधि उपकरण र क्षमता अभिवृद्धिका लागि १० लाख र प्रादेशिक अस्पताल जनकपुरधाममा ५० शय्या आईसीयू स्तरोन्नतिका लागि ५ करोड ६४ लाख ९५ हजार ९ सय रुपैयाँ उपलब्ध गराइएको हो ।

त्यस्तै आन्तरिक मामिला तथा कानून मन्त्रालयलाई समाचार संकलनको क्रममा कोरोना लागेर मृत्यु हुने पत्रकारका लागि ५० लाख र सामाजिक विकास मन्त्रालयलाई कोरोना लागेर मृत्यु हुने स्वास्थ्यकर्मी, चालक तथा अन्य कर्मचारीको राहतका लागि ५० लाख गरी १ करोड रुपैयाँ यी दुई मन्त्रालयलाई थप निकासा गरिएको छ ।

सामाजिक विकास मन्त्रालयले अर्थमन्त्रालयबाट विभिन्न शिर्षकमा थप रकम निकासा र रकमान्तर गरिएपनि आफ्नो मन्त्रालयमार्फत समेत बजेट खर्च भएको देखाएका छन ।

एउटै शिर्षकको खर्च रकम दुई दुई ठाउँमा ती मन्त्रालयहरुले देखाएको मन्त्रालय श्रोतको दाबी छ । प्रादेशिक अस्पतालमा आइसीयू निर्माणका लागि उक्त मन्त्रालयले कोषबाट रकम निकासा भएको देखाएको छ ।

ती मन्त्रालयहरुले आफ्नो बजेटबाट रकम खर्च बाहेक अर्थमन्त्रालयबाट रकामान्तर सहित थप रकम निकासा गराएको छ । प्रदेश सरकारले बजेट बाहेक अर्बौ रुपैया रकमान्तर सहित थप निकासा गराएपनि समुदायस्तरमा फैलिएको कोरोना नियन्त्रण गर्न असक्षम देखिएको छ ।

सामाजिक विकास मन्त्रालयले कोरोना उपकरण र औषधि शिर्षकमा ७६ करोडभन्दा बढी रकम निकासा गराएको छ ।

सो मन्त्रालयले यसबाहेक स्वास्थ्य कार्यालय धनुषाको कर्मचारीको तलबको नाममा ८२ लाख र जनचेतनामूलक सूचना प्रवाह गर्न ८० लाख रुपैयाँ निकासा गरेको छ । यस बाहेक प्रदेश सरकारले संघीय सरकारबाट पाएको १७ करोड २ लाख रुपैयाँ समेत खर्च गरेको छ ।

यतिको रकम निकासा गरिएपनि सम्बन्धित मन्त्रालयहरुले हालसम्म खर्च विवरण सार्वजनिकगरेको छैन ।
मन्त्रालयहरुले कोरोना भाइरस रोकथाम एवं नियन्त्रण खर्च हालसम्म सार्वजनिक गर्न नसक्नुको प्रमुख कारण व्यापक अनियमितता भएको आरोप लाग्दै आएको छ ।

यसरी दामासाही रुपमा बाँडिएको रकम प्राथमिकता प्राप्त क्षेत्रमा खर्च भयो(भएन भनेर अध्ययन हुनसकेको छैन ।

त्यसैले अख्तियार सहिन अन्य नियमनकारी निकायले भ्रष्टाचारमा संलग्नलाई तत्काल अनुसन्धान गरी दोषीलाई कानूनी दायरामा नल्याईए प्रदेस २ मा कुनै पनि बजेटको सहि सदुपयोग नहुने निश्चित छ । सभार खाेज केन्द्र अनलाइन

काठमाडौं । नेपाल पत्रकार महासङ्घले कार्यस्थलमा गएर समाचार सङ्कलन गर्ने सञ्चारकर्मीको कोरोना भाइरस (कोभिड १९) को निःशुल्क पिसीआर परीक्षणको व्यवस्था मिलाउन सरकारसंग आग्रह गरेको छ ।

महासङ्घका महासचिव रमेश विष्टले विज्ञप्ति जारी गर्दै कोभिड १९ को सङ्क्रमणको उच्च जोखिमका बीच कार्यस्थलमा खटिने सञ्चारकर्मीको निःशुल्क पीसीआर परीक्षणको व्यवस्था मिलाउन आग्रह गरेका हुन् ।

महामारीको सङ्क्रमणबाट जोगिन आफ्नो स्वास्थ सुरक्षालाई उच्च प्राथमिकतामा राखेर मात्रै काम गर्न समेत महासङ्घले सबै सञ्चारकर्मीलाई अपिल समेत गरेको छ । सञ्चार प्रतिष्ठानले पनि अति आवश्यक बाहेक घरबाटै काम गर्ने व्यवस्था मिलाउन र कार्यालय तथा कार्यस्थलमा खटिने सञ्चारकर्मीका लागि स्वास्थ्य सामग्रीको प्रयोगसंगै पर्याप्त सचेतता अपनाउने वातावरण निर्माण गर्न महासङ्घले आग्रह गरेको छ ।

विश्वव्यापी रुपया फैलिएको कोभिड-१९ को सङ्क्रमण पछिल्ला दिनमा नेपालमा पनि तीव्र गतिमा फैलिँदै गइरहेको उल्लेख गर्दै उहाँले महामारीको यो जटिल परिस्थितिमा पनि नेपाली सञ्चार क्षेत्रले उच्च जोखिम मोलेर समाचार सङ्कलन तथा सम्प्रेषण गरिरहेको बताए ।

सङ्क्रमणको दर वृद्धि भएसँगै पछिल्लो समयमा अग्रभागमा रहेर कार्य गरिरहेका सञ्चारकर्मीमा समेत कोरोना सङ्क्रमण देखिने क्रम बढेको महासङ्घले जनाएको छ । महासचिव विष्टका अनुसार हालसम्म कम्तीमा तीन दर्जन सञ्चारकर्मी सङ्क्रमित भइसकेका छन् । विशेषगरी फिल्डमा खटिने सम्वाददाता, फोटो पत्रकार र क्यामेरा पर्सन सङ्क्रमणको उच्च जोखिममा रहेका छन् । रासस

काठमाडौं । पछिल्लाे २४ घण्टामा काठमाडौं उपत्यकामा थप २२४ जनामा कोरोना भाइरस संक्रमण पुष्टि भएको छ । जसमा काठमाडौंमा १७७, ललितपुरमा ३३ र भक्तपुरमा १४ जना रहेका सोमबारको नियमित प्रेस ब्रिफिङमा स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले जानकारी दिए ।

उनका अनुसार हालसम्म सक्रिय संक्रमितको संख्या १३ हजार ७१५ रहेको छ भने संस्थागत आइसोलेसनमा ९ हजार १५४ र होम आइसोलेसनमा ४५६१ जना रहेका छन् ।

काठमाडाैँ । जिल्ला प्रहरी कार्यालयको हिरासतमा रहेका एक कोरोना सङ्क्रमित थुनुवा आइसोलेसन केन्द्रबाटै फरार भएका छन् ।

कोरोना सङ्क्रमण देखिएपछि बाँकेको खजुराखुर्दस्थित कृषि तालीम केन्द्रको आइसोलेसनमा स्वास्थ्यलाभ गरिरहेका ती थुनुवा आइतबार फरार भएको जिल्ला प्रहरी कार्यालय बाँकेका प्रमुख प्रहरी उपरीक्षक ओमबहादुर रानाले जानकारी दिए।

लागूऔषध कोरेक्स मुद्दाका ती थुनुवालाई यही भदौ ५ गते कोरोना सङ्क्रमण पुष्टि भएपछि कृषि तालीम केन्द्रको आइसोलेसनमा लगिएको थियो । पाँच सिसी लागूऔषध कोरेक्ससहित ती व्यक्ति पक्राउ परेका थिए ।

आइसोलेसनबाटै सङ्क्रमित थुनुवा फरार भएपछि खोजीका लागि सुरक्षा टोली परिचालन गरिसकेको प्रहरी उपरीक्षक रानाले बताउनुभयो । सङ्क्रमित थुनुवा फरार भएपछि आइसोलेसनको सुरक्षार्थ खटिएका प्रहरीलाई जिल्ला प्रहरी कार्यालयमा फिर्ता बोलाएर आवश्यक अनुसन्धान भइरहेको छ । उक्त आइसोलेसनमा प्रहरी सहायक निरीक्षकको नेतृत्वमा पाँच प्रहरी खटिएका थिए । 

काठमाडौँ — नेत्रविक्रम चन्द(विप्लव) समूहको मध्य केन्द्रीय कमान्डका तत्कालीन सैन्य कमान्डर जीवन लामासहित ८८ जना कार्यकर्ता आइतबार जनता समाजवादी पार्टी (जसपा) मा प्रवेश गरेका छन् ।

समूहका ब्युरो सदस्यहरू प्रह्लाद फुयाँल, रौतहट जिल्ला पूर्वसेक्रेटरी गोपाल जिम्बा तथा ललितपुर, मकवानपुर, काभ्रे, चितवन, रौतहट, बारा, पर्सा, काठमाडौं, दोलखा, धादिङ, नुवाकोट र सिन्धुलीमा विभिन्न तहको जिम्मेवारीमा रहेका कार्यकर्ताहरू पार्टी प्रवेश गरेका जनता समाजवादीद्वारा जारी विज्ञप्तिमा उल्लेख छ ।

उनीहरूलाई जनता समाजवादीका अध्यक्ष महन्थ ठाकुर, अर्का अध्यक्ष उपेन्द्र यादव र वरिष्ठ नेताहरू अशोक राई, बाबुराम भट्टराई, राजेन्द्र श्रेष्ठसहितका नेताहरूले स्वागत गरेका थिए ।