मेक्सिकोको अदालतले १० जनालाई किन दियो १४१ वर्षको जेल सजाय ?

मेक्सिको सिटी । मेक्सिकोको एक अदालतले मङ्गलवार १० जनालाई १४१ वर्ष तीन महिनाको जेल सजाय सुनाएको छ । यी सबै व्यक्तिहरू पश्चिमी मेक्सिकोको जालिस्को राज्यको एक फार्म हाउसमा खतरनाक आपराधिक गिरोह जालिस्को न्यु जेनेरेसन कार्टेल (सीजेएनजी) मा मान्छे भर्ती गर्ने, हत्या गर्ने र शव बेपत्ता पार्ने घटनामा संलग्न थिए ।

जालिस्को राज्यको इसागुइरे रान्च (फार्म हाउस) २०२१ देखि अपराधीहरूलाई भर्ती गर्न र तालिम दिन प्रयोग गरिँदै थियो । यो फार्म हाउसको खुलासा यसै वर्ष भएको थियो, जसले सम्पूर्ण क्षेत्रमा डर र आतङ्क फैलाएको थियो ।

२०२४ को सेप्टेम्बरमा पहिलो पटक फार्म हाउसमा छापा मारिएको थियो र त्यहाँबाट १० जना अभियुक्तहरूलाई पक्राउ गरिएको थियो । यिनीहरू तीन जनाको अपहरण र हत्यामा दोषी ठहर भएका छन् ।

अदालतले प्रत्येक अपराधीलाई १४१ वर्ष तीन महिनाको जेल सजाय सुनाएको छ । यसका साथै पीडित परिवारलाई १३ लाख मेक्सिकन पेसो क्षतिपूर्ति दिन आदेश पनि दिइएको छ । यस मुद्दामा पाँच अन्य व्यक्ति अझै पनि आरोपको सामना गरिरहेका छन् ।

यसमा तीन स्थानीय प्रहरी अधिकारी, नयाँ मानिसहरू भर्ती गर्ने गिरोहका सदस्य र तेउचिट्लान सहरका मेयर जोस मुर्गुइया स्यान्टियागो पनि छन् ।

जलिस्कोको मानव अधिकार सङ्गठनले सन् २०२१ मा नै स्थानीय प्रशासनलाई यो फार्म हाउसले खतरनाक गिरोह चलाएको चेतावनी दिएको थियो । तर सहर प्रशासनले कुनै कारबाही गरेन । यसपछि मेयरलाई पक्राउ गरिएको थियो ।