ओलीको भूमिकाप्रति नेताहरू सशंकित, प्रचण्ड र माधव नेपालसहित चार नेता छलफलमा

काठमाडौं । सत्तारूढ दल नेपाल कम्युनिस्ट पार्टी (नेकपा)को विवाद मत्थर भए पनि अध्यक्ष एवं प्रधानमन्त्री केपी ओलीको भूमिकाप्रति केहि नेताहरू सशंकित देखिएका छन्।

अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल स्थायी समिति बैठकको रणनीति बनाउन जुटेका छन्। प्रचण्ड, नेपालसहित सचिवालयमा रहेका अर्का वरिष्ठ नेता झलनाथ खनाल र प्रवक्ता नारायणकाजी श्रेष्ठबीच सोमबार बिहान दुई घण्टा छलफल भएको हो।अध्यक्ष ओलीले सचिवालय बैठकमा आत्मालोचनासहित गरेका प्रतिबद्धताको अक्षरशः कार्यान्वयनको प्रस्ताव स्थायी समितिमा आउनुपर्नेबारे छलफल भएको हो।

प्रचण्ड, नेपाल, खनाल प्रवक्ता श्रेष्ठको निवास हात्तीवन पुगेका थिए। पार्टीको विवाद चर्किरहेका बेला शनिवार बसेको सचिवालय बैठकले केही हदसम्म किचलो साम्य पारेको छ। प्रधानमन्त्रीको राजीनामा र पार्टी नै फुट्न सक्ने तहसम्म पुगेको नेकपा विवाद एकाएक साम्य भएको छ। शनिवार सचिवालय बैठक अघि अध्यक्ष तथा प्रधानमन्त्री केपी शर्मा ओली र पुष्पकमल दाहाल प्रचण्डको भेटमा विवाद सुल्झाएको नेताहरुले बताएका छन्।

स्थायी समिति बैठक माग गरेका २० सदस्यले छुट्टै पूरक प्रस्ताव तयार पार्ने र त्यो बैठकमा पेस गर्ने जानकारी प्रचण्ड र नेपाललाई दिएका थिए। त्यसबारे के गर्ने भन्ने विषयमा छलफल गर्न उनीहरू श्रेष्ठ निवासमा जुटेका हुन्।

अध्यादेश प्रकरणपछि स्थायी समिति बैठक माग गर्नेमा प्रचण्ड र नेपाल पक्षका नेताहरू थिए। उनीहरू शनिबारको सचिवालय बैठकमा भएको समझदारीप्रति सन्तुष्ट देखिएका छैनन्। स्थायी समितिमा आफ्ना विषय प्रस्टसँग राख्न पाउनुपर्ने भन्दै उनीहरूले दबाब बढाएका छन्। नेपालले आइतबार आफूनिकट स्थायी समिति सदस्यसँग भेट गरेका थिए। उनले सोमबार प्रचण्ड पक्षका स्थायी समिति सदस्यसँग छलफल चलाए। स्थायी समिति सदस्य हरिबोल गजुरेलले पहिले अध्यक्षको प्रस्ताव हेरेर सामूहिक पूरक प्रस्ताव ल्याउन छलफल गरिरहेको बताए।

सचिवालय बैठकमा प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डसहितका नेताहरुले आत्मालोचना गरेका थिए। बैठकपछि नेताहरु अब पार्टी र सरकार विधिवत् रुपमा चल्ने बताउँछन्।

प्रधानमन्त्रीको राजीनामा मागेका शीर्ष नेताहरु तत्कालका लागि राजीनामा टरेको प्रतिक्रिया दिन थालेका छन्।