‘सरकारविरुद्ध नागरिक समाजसहितको संयुक्त मोर्चा गठन !’

सुर्खेत । नेपाल कम्युनिस्ट पार्टी (नेकपा) का नेता जनार्दन शर्माले प्रतिनिधि सभा विघटन संवैधानिक ‘कू’ भएकाले त्यसविरुद्ध बृहत संयुक्त मोर्चा गठन गरिने बताएका छन् ।

नेकपा स्थायी कमिटी सदस्य एवं कर्णाली प्रदेश इन्चार्जसमेत रहेका शर्माले उक्त मोर्चामा राजनीतिक दलहरुका साथै नागरिक समाजको समेत सहभागिता हुने बताए ।

‘यस्तो मोर्चाले उपलब्धि हासिल गरिसकेपछि सबैको संयुक्त स्वामित्व स्थापित गरी कम्तीमा १० वर्षसम्म सँगसँगै जाने वातावरण मिलाइने छ,’ सोमबार वीरेन्द्रनगरमा आयोजित पत्रकार सम्मेलनमा उनले भने, ‘यसले मात्र राष्ट्रिय स्वाधिनता र संविधानको संरक्षण गर्नेछ ।’ विगतमा संयुक्त संघर्षबाट प्राप्त उपलब्धिमा राजनीतिक दलले मात्र स्वामित्व लिँदा अहिलेको अवस्थामा सिर्जना भएको पनि उनले बताए ।

नेता शर्माले सरकारले गरेको संसद विघटन देशलाई निरंकुशतातर्फ लैजाने पहिलो ‘स्टेप’ मात्र भएको बताए । प्रधानमन्त्री केपी शर्मा ओली पुरानै दलाल र नोकरशाहीबाट घेरिँदा देश संकटतर्फ गएको उनको भनाई छ ।