काठमाडाैं । चीनसँगको अन्तर्राष्ट्रिय व्यापारिक नाका रसुवागढीबाट चिनियाँ खाद्य सामग्रीको आयात दुई महिनासम्म हुन सकेन। चीनको तिब्बतका विभिन्न स्थानमा कोरोना देखिएपछि नाका बन्द हुन पुग्यो जसका कारण भदौ र असोजमा खाद्य सामग्रीको आयात ठप्प भयो। अहिले नाका सञ्चालनमा आएको भएपनि खाद्य सामग्रीको आयातले निरन्तरता पाउन सकेको छैन।
चालु आर्थिक वर्ष २०७९/८० को साउन महिनामा ४९.३ मेट्रिक टन खाद्य सामग्री आयात भएको खाद्य आयात तथा निर्यात गुणस्तर प्रमाणीकरण कार्यालयले जनाएको छ। साउनमा ४० वटा नमुना परीक्षण गरेको थियो।
कार्यालयका अनुसार नाकाबाट केही महिनायता आयातमा पनि कमि आएको छ। चीनबाट सोया सस, भिनेगर, अचार, पीठो, सिन्के चाउचाउ, सिजनिङ पाउडर, छुर्पी, डोमा, भोटे चिया, चिकेन सुप, भेजिटेबल सुप, रेड विन पेष्ट, चामल आदि सामग्रीको आयात हुने गरेको छ।
नाकाबाट पछिल्लो न्यून खाद्य सामग्री आयात भएको खाद्य अनुसन्धान अधिकृत नवीन देउजाले बताए। उनका अनुसार गत आइतबार नाकाबाट ९८० केजी सिजनिङ पाउडर मात्र आएको छ।
चीनबाट आउने खाद्य सामग्री नेपालमा बस्ने चिनियाँले नै प्रयोग गर्छन। कार्यालयले २०७५ माघदेखि चीनबाट आएका खाद्य सामग्रीको नमुना परीक्षण गर्दै आएको छ।
आर्थिक वर्ष २०७७/७८ मा २ सय ७ टन र २०७८/७९ मा ३९१.०६ टन चिनियाँ खाद्य सामग्री आयात भएको कार्यालयको तथ्यांक छ। अन्नपूर्णपोस्ट
