रसुवा । वर्षायामलाई ध्यानमा राखी आइपर्ने विपद् व्यवस्थापनका लागि उद्वार टोली तयार गरिएको छ । सम्भावित खोज तथा उद्धारका लागि लाङटाङ राष्ट्रिय निकुञ्जको सुरक्षामा तैनाथ नेपाली सेना कालीजङ्ग गणका तर्फबाट ३० तथा नेपाल प्रहरी एवं सशस्त्र प्रहरी बलका १०–१० गरी ५० जनाको उद्धार टोली तयार गरिएको जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी हरिप्रसाद पन्तले जानकारी दिए ।
टोली मनसुनबाट हुनसक्ने क्षति न्यूनीकरण गर्दै आपत्कालीन अवस्थामा तुरून्त परिचालन गर्न सक्ने बताइएको छ । यस्तै बाढीपहिराको असरले क्षति हुन सक्ने नेपाल चीनबीचको बेत्रावती, मैलुङ, स्याफ्रुबेँसी, रसुवागढी अन्तरराष्ट्रिय राजमार्ग एवं सहायक मार्गको संरक्षणका लागि समितिले जिल्लाका सबै गाउँपालिकालाई जिम्मेवारी दिएको छ ।
वर्षायाममा राजमार्ग निरन्तर चालु गराउन उत्तरगया, कालिका एवं गोसाइँकुण्ड गाउँपालिका तथा सिम्ले, भोर्लेतर्फ नौकुण्डका साथै थाम्बुचेततर्फको सहायक मार्ग संरक्षण गराउन आमाछोदिङ्मो गाउँपालिकालाई जिम्मेवारी तोकिएको विपद् व्यवस्थापन समितिले जनाएको छ ।
वर्षायाममा आकस्मिक पहिरो पन्छाउने कार्यमा सदाझँै जिल्लाभित्र सञ्चालित जलविद्युत् आयोजना र गल्छी, त्रिशूली, मैलुङ, स्याफ्रुबेँसी सडक सुधार आयोजनासमेतको स्वामित्वमा रहेका स्काभेटर जस्ता उपकरण प्रयोगमा ल्याइने व्यवस्था मिलाइएको प्रजिअ पन्तले जानकारी दिए । रासस
