काठमाडौं । नेपाली कांग्रेसले संसद विघटनविरुद्ध थप आन्दोलनका कार्यक्रम घोषणा गरेको छ । निर्वाचन क्षेत्र र स्थानीय तहकेन्द्रित विरोध प्रर्दशन गरिसकेको कांग्रेसले अब माघ १९, २४ र ३० गते सबै जिल्लामा विरोध प्रदर्शन गर्ने निर्णय गरेको कांग्रेसले जनाएको छ ।
आज बसेको केन्द्रीय समिति बैठकले १९ गते भातृसंस्थाहरुले, २४ गते शुभेच्छुक संस्थाहरुले र ३० गते जिल्ला कार्यसमितिहरुले सबै जिल्लामा विरोध प्रदर्शन गर्ने निर्णय गरेको छ ।
कांग्रेस प्रवक्ता विश्वप्रकाश शर्माले प्रतिनिधि सभा विघटन असंवैधानिक भएको र आफूहरु सुरुदेखि नै विरोधमा रहेको बताउँदै थप विरोध कार्यक्रम घोषणा गरेको बताए । जारी बैठकमा कांग्रेसको महाधिवेशनदेखि प्रदेशसहितको अन्य एजेन्डाबारे छलफल जारी रहेको प्रवक्ता शर्माले बताए ।
केन्द्रीय समिति बैठकले अधिवेशन हुन नसकेर कार्यसमितिको म्याद समाप्त भएका भातृसंगठनको म्याद ६ महिनाका लागि थप्ने निर्णय पनि गरेको छ । साथै बैठकले सोमबार नागरिक समाजले गरेको आन्दोलनमा सरकारका तर्फबाट भएको दमनको भर्त्सना गरेको छ।
