नवविवाहित दुलहीले बाटाेमै कार रोक्न लगाएर खोलामा हाम्फालिन्

एजेन्सी । बिहे गरेर पतिको घर गइरहेकी दुलहीले कार रोक्न लगाएर खोलामा हाम्फालिन्
भारतको राजस्थानस्थित सवाई माधोपुरमा नवविवाहिता महिलाले पतिको घर जाँदै गर्दा कार रोक्न लगाएर चम्बल नदीको पुलबाट हाम्फालेकी छन् ।

दुलाहा र उनको परिवार स्तब्ध भएका छन् भने दुलहीको परिवार रोइरहेको छ ।

अल्लाहपुर गाउँमा धुमधामसित युवतीको विवाह भएको थियो । बिहेपछि युवती आफ्ना पतिका साथ घर गइन् । कारमा जाँदै गर्दा चम्बल नदीको पुल पुगेपछि दुलहीले बान्ता आएको भन्दै गाडी रोक्न लगाइन् ।

त्यसपछि उनी गाडीबाट निस्किन् अनि पुलको रेलिङमा चढेर नदीमा हाम्फालिन् । दुलाहा र उनका साथीहरू चिच्याउन थाले अनि स्थानीयहरू पनि दौडँदै आए । प्रहरी पनि घटनास्थलमा पुग्यो ।

प्रहरीले गाउँलेहरूको सहयोग लिएर गोताखोरहरूलाई दुलहीको खोज गर्न लगाएको छ । तर अहिलेसम्म दुलहीको अत्तोपत्तो छैन ।

विवाहका बेलामा युवती खुशी देखिएको उनका परिवारका मानिस बताउँछन् । बिहेमा युवतीले पतिसँग बेस्सरी डान्स पनि गरेको उनीहरूको भनाइ छ ।

चम्बल नदी राजस्थान र मध्य प्रदेशको सीमामा पर्छ । घटनाको जानकारी पाएपछि दुवै राज्यका प्रहरी घटनास्थल पुगेर अनुसन्धान गरिरहेका छन् ।