काठमाडौँ । सर्वोच्च अदालतले कोरोना भाइरस(कोभिड -१९) संक्रमितको उपचारका लागि अक्सिजन आपूर्ति सहज बनाउन सरकारका नाममा अन्तरिम आदेश जारी गरेको छ ।
आज सर्वोच्चका न्यायाधीश बमकुमार श्रेष्ठको इजलासले आदेश जारी गर्दै कोरोना संक्रमितको उपचारका लागि आवश्यक औषधि र अक्सिजनको आपूर्ति सहज बनाउन, थप साधनयुक्त अस्पताल सञ्चालनमा ल्याउन सरकारका नाममा अन्तरिम आदेश जारी गरेको हो ।
सर्वोच्चले अधिवक्ता शैलेन्द्रकुमार अम्बेडकरको रिटमाथि सुनुवाई गर्दै नागरिकको जीवनसँग प्रत्यक्ष सम्बन्ध र सरोकार राख्ने हुनाले अक्सिजन, औषधी, अस्पताल र जनशक्ति व्यवस्थापनका लागि सरोकारवालाको प्रतिनिधित्व हुने गरी एउटा कार्यसमिति बनाउन पनि निर्देशन दिएको छ ।
