मन्त्री झाक्री भन्छिन्, ‘काम गरौँ न त भन्या, चुनाव आईहाल्यो’

 

शहरी विकासमन्त्री रामकुमारी झाक्रीले काम गर्न खोज्दा बाधा आईपरेको गुनासो गरेकी छिन् ।

मंगलबार राष्ट्रिय शहरी नीति, शहरी विकास ऐन र युटिलिटी करिडोर ऐन तर्जुमासम्बन्धी परामर्श गोष्ठीमा मन्त्री झाक्रीले आफू मन्त्री भएर आएपछि निरन्तर अन्तर मन्त्रालय संवाद गरिरहेको तर काम गर्न नसकिएको गुनासो गरेकी हुन् ।

विशेषगरी सार्वजनिक जमिनहरुको संरक्षण र तिनको उपभोगका सम्बन्धमा काम गर्न खोज्दा आफू असफल हुन परेको गुनासो सांकेतिक रुपमा मन्त्री झाक्रीले राखेकी हुन् ।

‘प्रधानमन्त्री ज्यूले मलाई पहिल्यै पनि सार्वजनिक सम्पत्तिको संरक्षण गर्ने काम गर्न निर्देशन दिनुभएको थियो’ मन्त्री झाक्रीले प्रधानमन्त्री देउवाकै अगाडी भनिन्, ‘केही कामहरु गर्न पनि खोजेका थियौँ हामीले । तर, कहिले घाम लाग्छ, कहिले पानी पर्छ, जाडोमा पनि गर्न हुँदैन, गर्मीमा पनि गर्न हुँदैन, चाडवाडमा पनि कुनै काम गर्न हुँदैन, त्यसपछि चुनाव आउँदा त झन गर्नु नै हुँदैन ।’

मन्त्री झाक्रीले सार्वजनिक जमिन हडपेर बसेका र सरकारी जग्गा मिलिमतो मार्फत आफ्नो नाममा गरेर बसेकाहरुप्रति लक्षित गर्दै आफ्नो भनाई राखेकी थिईन् । त्यसअघि प्रधानमन्त्री देउवाले खाली ठाउँ जति सबै भूमाफियाहरूले आफ्नो नाममा गरेको र यसरी हडपिएका जग्गा सहरी विकास मन्त्रालय र गृह मन्त्रालयले मिलेर जोगाउनुपर्ने बताएका थिए ।

‘सार्वजनिक सम्पत्तिको अतिक्रमण बढेर अहिले कुनै विपत्तिको बेलामा २ सय जना मान्छेलाई एकै ठाउँमा राख्न सक्ने खाली ठाउँ काठमाडौँमा कतै छैन’ उनले भनिन्, ‘टुँडिखेल छ, त्यहाँ पनि १० फिटको बार लगाएर सर्वसाधारणलाई पहुँच दिइँदैन ।’

Facebook Comments