एजेन्सी । आइसिसि टी–२० विश्वकप २०२१ अन्तर्गतको खेलमा भारतले स्कटल्यान्डलाई ८ विकेटले हराएको छ। सुपर १२ को समूह २ मा रहेको भारतले स्कटल्यान्डमाथि फराकिलो जित निकाल्दै नेटरनरेटमा सुधार गरेर सेमिफाइनल पुग्न सम्भावना जीवितै राखेको छ।
जितका लागि ८६ रनको सामान्य विजयी लक्ष्य पछ्याएको भारतले ६.३ ओभरमा २ विकेट गुमाउँदै पूरा गर्यो। भारतका ओपनर लोकेश राहुलले १९ बलमा ६ चौका र ३ छक्का सहित ५० रनमा आउट भए।
रोहित शर्मा १६ बलमा ५ चौका र १ छक्का सहित ३० रनमा एलबीडब्लू आउट भए। सूर्यकुमार यादव ६ र विराट कोहली २ रनमा अविजित रहे।
त्यसअघि दुबई इन्टरनेशल क्रिकेट स्टेडियममा टस हारेर ब्याटिङ थालेको स्कटल्यान्ड १७.४ ओभरमा ८५ रनमा अल आउट भएको थियो। स्कटल्यान्डका ओपनर जर्ज मुन्शेले १९ बलमा ४ चौका र १ छक्का सहित सर्वाधिक २४ रन बनाए। कलुम म्याकलड १६ र माइकल लिस्क २१ रनमा आउट भए।
माइकल लिस्कले १२ बलमा २ चौका र १ छक्का प्रहार गर्दै २१ रन बनाए। मार्क वाटले १३ बलमा २ चौका सहित १४ रन बनाए।
भारतका स्पिनर रविन्द्र जडेजाले ४ ओभरमा १५ रन खर्चेर ३ विकेट लिए। तीव्र गतिका बलर मोहम्मद शामीले ३ ओभरमा १ मेडन सहित १५ रन खर्चेर ३ विकेट लिए। जस्प्रित बुमराहले २ विकेट लिए। रविचन्द्रन आश्विनले एक विकेट हात पारे।
यो जितसँगै भारत तेस्रो स्थानमा उक्लिएको छ। भारतको ४ खेलमा २ मा जित र २ मा हार सहित ४ अंकका साथ तेस्रो स्थानमा छ। भारतले अन्तिम खेलमा नामिबियालाई सोमबार विशाल अन्तरले हराउनु पर्छ। तर अन्तिम खेलमा आइतबार न्युजिल्यान्ड अफगानिस्तानसँग पराजित भएको खण्डमा मात्र भारत सेमिफाइनलमा पुग्न सक्छ।
