भारतद्वारा बाढी प्रभावितहरुका लागि ८ करोडबराबरको राहत वितरण

काठमाडौं । भारत सरकारले नेपालका बाढी प्रभावितहरुका लागि आठ करोड रुपैयाँबराबरको राहत सामग्री हस्तान्तरण गरेको छ ।

शुक्रबार एक कार्यक्रमको आयोजना गरी नेपालका बाढी प्रभावितहरुका लागि भारत सरकारले नेपाल भारत महिलामैत्री समाज र प्राज्ञिक विद्यार्थी परिषद्मार्फत आठ करोड रुपैयाँबराबरको राहत सामग्री हन्तान्तरण गरेको हो ।

नेपालका १५ जिल्लाहरुमा बाढी तथा पहिरोबाट प्रभावित परिवारहरुका लागि वितरण गर्न लागिएको सो राहत सामग्रीमा टेन्ट, प्लास्टिक सिट, स्लीपिङ्ग म्याट र औषधिहरु रहेका छन्। भारतीय राजदूतावासकी मिसन उपप्रमुख नामग्या खम्पाले नेपाल भारत महिलामैत्री समाजकी अध्यक्ष चन्दा चौधरी र प्राज्ञिक विद्यार्थी परिषद्का अध्यक्ष नारायण ढकाललाई बाढी तथा पहिरोबाट प्रभावित परिवारहरुका लागि वितरण गर्न लागिएको टेन्ट, प्लास्टिक सिट, स्लीपिङ म्याट र औषधिहरु हस्तान्तरण गरेका हुन् ।

सहयोग हस्तान्तरण गर्दै मिशन उपप्रमुख नामग्या खम्पाले राहत वितरण गर्न पाउँदा खुशी लागेको बताइन् । नेपाल र भारतले बाढी व्यवस्थापनको क्षेत्रमा दशकौँदेखि सहकार्य गर्दै आएको उल्लेख गर्दै उनले यस सहयोगले बाढी प्रभावित स्थानीय जनतालाई राहत पुग्ने विश्वास व्यक्त गरिन् ।

नेपाल भारत महिलामैत्री समाजकी अध्यक्ष चौधरीले भारत सरकारले बाढी प्रभावितका लागि उपलब्ध गराएको उक्त राहत सामग्री प्रदेश नं. २ का पर्सा, बारा, रौतहट, सर्लाही, महोत्तरी, धनुषा, सिरहा र सप्तरीमा तथा लुम्बिनी प्रदेशको रुपन्देही जिल्लाका बाढी प्रभावितहरुका लागि मंगलबारदेखि वितरण गरिने जानकारी दिइन् ।त्यस्तै प्राज्ञिक विद्यार्थी परिषद्का अध्यक्ष नारायण ढकालले गोरखा, मनाङ, सिन्धुपाल्चोक, रसुवा, दोलखा र धादिङ जिल्लाका बाढी तथा पहिरो पीडितका लागि राहत सामग्री वितरण गर्ने बताए । उनले आफूहरु सम्बन्धित ठाउँमै पुगेर वास्तविक प्रभावितलाई राहत सामग्री उपलब्ध गराउने बताए ।

भारत सरकारले नेपाललाई विपद् व्यवस्थापनका लागि मानवीय सहायता तथा राहत सहयोग नियमित रुपमा उपलब्ध गराउँदै आएको छ।